1415. Oktober 26. Constantia

In nomine domini amen. Sub Anno Nativitatis eiusdem Millesimo Quadringentesimo decimoseptimo Indicione decima, Sede apostolica Rectore carente, die decima mensis Novembris hora Nonarum vel quasi, In Monasterio S. Vincencii extra muros Wratislavienses, In Stuba ubi dominus . . Abbas ibidem tempore yemali consuevit prandere In meique Notarii publici subscripti et testium infrascriptorum ad hoc vocatorum specialiter et rogatorum presencia Constitutus personaliter Venerabilis pater dominus Johannes de Brega miseracione divina Abbas Monasterii S. Vincencii predicti Premonstratensis ordinis, habens et tenens in suis manibus quandam litteram patentem Venerabilis patris d. Jacobi permissione divina Abbatis Monasterii Steynfeldensis ordinis Premonstratensis predicti Coloniensis diocesis unacum subscripcione Nicolai Petri de Broda theutunicali Pragensis diocesis publici Imperiali auctoritate Notarii, Necnon ipsius vero Sigillo sigillatam, michi Notario publico subscripto effectualiter exhibuit et presentavit, asserens se huiusmodi littere habere indigenciam locis et partibus in diversis, ad quas et que sine periculo propter viarum discrimina defferri non valeat. Petens igitur eandem per me Notarium publicum infrascriptum redigi in formam publici documenti, ut dicte littere tamquam autentice tam in Judicio quam extra poterit haberi plena fides. Cuius quidem littere tenor sequitur in hec verba:
Nos Jacobus permissione divina Abbas Monasterii Steynfeldensis ord. Prem. Col. dioc. Venerabilibus in Cristo fratribus et dominis . . Prepositis Strelinensi, sancte Margarethe extra muros Bitthomienses, sancte Marie in Czarnowans alias domus dei, Vladislav. Cracov. et Wratislaw dioc. qui pronunc sunt et pro tempore fuerint earundem Prepositurarum Prelatis, Fraternam salutem sinceramque in domino caritatem. Cum Monasterium S. Vincencii extra muros Wratislavienses dicti nostri ordinis Premonstratensis ex antiquo nostra sit filia specialis Nosque in eodem Juspaternitatis hucusque habuimus ad visitandum, corrigendum et eleccionibus presidendum ac postulacionibus et quibusvis aliis actibus iuxta statuta ordinis et dicti Monasterii S. Vincencii consuetudines, observatis omni cum reformacione que nobis ex debito officii paternitatis incumbunt, propter nimiam loci ipsius distanciam et viarum discrimina accedere personaliter pro singulis querelis et necessitatibus oportunis temporibus accedere non valemus. Idcirco dilecti in Cristo nobis filii Andreas Abbas et Conventus supradicti Monasterii S. Vincencii nobis humiliter supplicarunt, cum ipsis ut premissum est pro singulis non patet securus accessus ipsius ecclesie et Monasterii, Quatenus auctoritatem nostram paternam et vices nostras cum plenitudine potestatis aliquibus . . Prelatis nostri ordinis zelatoribus vicinius ipsorum Monasterio adiacentibus committere dignaremur. Nos vero iustis ipsorum peticionibus devotis supplicum libenter annuimus illasque favoribus et honestate prosequimur oportunis, et cum iuste petentibus non sit denegandus assensus, de vestre discrecionis industria plurimum in domino confidentes vobis tenore presencium litterarum auctoritatem nostram paternam et vices nostras cominittimus plenarie et in toto ac si personaliter auctoritative adessemus, nichil nobis in hac parte specialer reservantes, Ad visitandum dictum Monasterium S. Vincencii et corrigendum seu reformandum que fuerint corrigenda et reformanda, tam in capite quam in membris, solum deum pre oculis habendo, in quo eciam vestram conscienciam oneramus, Insuper eleccioni, postulacioni Abbatis seu Abbatum, aliorum Prelatorum ad gremium Monasterii S. Vincencii spectancium, auctoritate nostra paterna presidendum, electum vel postulatum aut electos postulatos confirmandum, quando et quocienscunque necesse fuerit, et quemvis alium actum legitimum predicti Monasterii fratres curatos et non curatos ac subiugatos indiguerint reformari (sic) secundum deum et (ordinis) nostri instituta et consuetudines. Rebelles vero et inobedientes seu discordias in eleccione postulacione Abbatis seu Abbatum seu aliorum prelatorum ad gremium ecclesie spectancium si contigerit publice vel occulte seminantes, et nostri ordinis instituta seu nostram presentem ordinacionem infringentes verbo opere vel facto, auctoritate nostra qua supra et per ordinis disciplinam, excommunicacionis sentenciam mandamus districte compescendum. Et si quod absit predicti discordiam seminantes directe vel indirecte publice vel occulte, correpti fuerint nostram Sentenciam excommunicacionis et mandatum non curantes, contra tales rebelles inobedientes brachium concedimus seculare si necesse fuerit invocandum. Insuper volumus et auctoritate nostra paterna indulgemus, quod prefati electi aut postulati munus consecracionis et confirmacionis ab ipsorum ordinario loci valeant percipere eum effectu. Presentibus post decennium minime valituris. Super quibus omnibus et singulis premissis presentem nostram litteram ordinacionem seu concessionem in se continentem seu continentes per Nicolaum Notarium publicum infrascriptum scribi et publicari mandavimus, nostrique Sigilli Abbacialis dignitatis (sic) iussimus communiri. Actum et datum in Civitate Constanciensi die vicesimasexta mensis Octobris hora vesperorum vel quasi, vacante sede Apostolica, Anno domini Millesimo Quadringentesimo Quintodecimo. Presentibus ibidem Honorabilibus et discretis viris dominis Arnoldo priori Monialium Monasterii in Mera Coloniensis diocesis, Andrea Cantore Lubicense, et Magistro Vlrico licenciato in Medicina, Lubicensis et Constanciensis diocesis, testibus ad premissa vocatis specialiter et rogatis. Deinde sequitur subscripcio Notarii huiusmodi sub tenore: Et ego Nicolaus Petri de Broda Theutunicali Clericus Pragensis diocesis publicus Imperiali auctoritate Notarius, Quia premissis omnibus et singulis dum sic ut premittitur coram Venerabili patre domino Jacobo Abbate agerentur et fierent, una cum prenominatis testibus presens fui eaque omnia et singula sic fieri vidi et audivi, Ideoque presens publicum Instrumentum de mandato prefati domini Jacobi Abbatis conscripsi, publicavi et in hanc publicam formam redegi, Signo et nomine meis solitis et consuetis signatum appensione Sigilli memorati Venerab. patris d. Jacobi Abbatis consignavi, Rogatus et requisitus in fidem et testimonium omnium et singulorum premissorum. Et huic littere quoddam Sigillum oblonge figure ad tergum de cera communi sive alba et ab intra de cera viridi coloris in pressula pergamenea erat appensum. In cuius quidem Sigilli medio sive ad faciem apparebat ymago virilis ad modum Abbatis stans habens in dextra manu baculum pastoralem in sinistra autem manu apparebat quidam liber depictus. In circumferencia vero eiusdem Sigilli legebantur hee dicciones: S. Abbatis ecclesie Steinfeldensis.
Super quibus omnibus et singulis premissis petitum fuit a me Notario publico subscripto presens publicum Instrumentum. Acta sunt hec Anno Indicione die mense hora et loco quibus supra. Presentibus Strennuo viro domino Cunczone de Reydeborg milite, Laurencio de Czobotha et Franczkone famulis suis, testibus ad premissa vocatis specialiter et rogatis.
Signum Notarii.
Et ego Thomas olim Materni de Wratislauia Clericus Wratislauiensis, publicus Imperiali auctoritate Notarius, Presens transsumptum sive exemplum ex predictis litteris originalibus fideliter de verbo ad verbum scripsi transsumpsi et exemplavi ad instantem peticionem prenominati domini Johannis Abbatis una cum descripcione Sigilli, nil addens aut minuens quod mutet sensum aut viciet intellectum, et diligenter demum collacione facta originales litteras et ipsum transsumptum recte concordare inveni et manu mea propria sub scripsi me hic et in hanc publicam formam redegi, Signo et nomine meis solitis et consuetis consignando, rogatus et requisitus in fidem et testimonium omnium et singulorum premissorum.

Aus dem Archive von S. Vincenz.

Codex Diplomaticus Silesiae, hrsg vom Vereine für Geschichte und Alterthum Schlesiens, Bd 1, Urkunden des Klosters Czarnowanz. Hrsg von dr W. Wattenbach, Breslau 1857.